حوزہ نیوز ایجنسی کے مطابق، قائد ملت جعفریہ پاکستان علامہ سید ساجد علی نقوی نے صوبہ بلوچستان کے ضلع موسیٰ خیل کے علاقے راڑہ شم میں 39 مسافروں کے قتل پر انتہائی دکھ اور افسوس لا اظہار کرتے ہوئے اس واقعہ کی شدید الفاظ میں مذمت کی ہے۔

انہوں نے کہا: 39 بے گناہ مسافروں کا قتل کرنا انتہائی خطرناک عمل ہے،مسافروں کے جان و مال کے تحفظ کو یقینی بنایا جائے۔

علامہ ساجد نقوی نے کہا: ظالم دہشتگردوں نے معصوم لوگوں کونشانہ بناکر سفاکیت اور ظلم کی انتہا کر دی، حکومت اس قسم کے دہشتگردی کے واقعات کی روک تھام کیلئے ٹھوس اقدامات کرے۔

انہوں نے حکومت پاکستان پر زور دیا کہ موسیٰ خیل سمیت دیگر علاقوں میں رونما دہشتگردی کے واقعات کی فوری تحقیقات کرائی جائیں۔ دہشتگردی کے مکمل خاتمے تک دہشتگردوں کے خلاف کارروائی کا عمل جاری رکھا جائے اور موسیٰ خیل واقعے کے ذمہ دار دہشتگردوں کو گرفتار کر کے سخت سزائیں دی جائیں۔

قائد ملت جعفریہ پاکستان نے شہدا کیلئے دعائے مغفرت اور ان کے لواحقین کے لیے صبر جمیل کی بھی دعا کی۔